نصيت العسكرية يومـ قالوا للنظامـ رجال ..

[نجم ال جميره]

السلام عليكم ورحمة الله وبركاته

صــباح الخــير والرضا

قصيدة قريتها وأعجبتني فحبيت أشارككم فيها ..

وللأسف ما أعرف شاعرها ..



ألا يالله عفـوك لا معـي بيجـر ولا جــوال

ولا عنـدي وظيفـة والتجـارة فاشـل فيـهـا

ولا عنـدي شهـاداتٍ ولا حرفـة تسـد الحـال

ولا حـظٍ كبيـر لا اخطـت الجـرة يقديـهـا

مخابي الثوب تومي ما دخلها من زمـان ريـال

بهـا فاتـورة الكهـرب ولا يمدينـي أقضيـهـا

على ذيك العراوي تتعب الحـادي مـع الجمّـال

ثـلاث شهـور فالورشـة وشهريـنٍ مغطيهـا

أبيها لـو تجمّـل يـوم وأجلبهـا علـى الـدلاّل

يجيهـا واحـدٍ حظـه مثـل حظـي ويشريهـا

نصيت العسكريـة يـوم قالـوا للنظـام رجـال

وقدمـت الملـف وصـورةٍ متشخـصٍ فيـهـا

خذا الأوراق مني واحـدٍ مـا عنـد أبـوه دلال

سلوم الناس وأهل المعرفـة والطيـب مخطيهـا

قراها في دقيقـة والتفـت عجـلٍ علـي وقـال

شهادتك العظيمة يـا ولـد ويـن أنـت مخفيهـا

هزيت الراس ما عندي تقول إنـي مـن البنغـال

وقـمـت أحــب خـشـمـه بالله تمشـيـهـا

حذفها من يـده شيـن الطبيعـة والنبـا والفـال

وقـال أزيـن تعـوّد صـوب نوقاتـك تعشيهـا

تناوشته من الكرسي وعفـت الحـلّ والترحـال

وضربته بالبيالـة عقـب مـا بيّحـت شاهيهـا

خذونـي للسجـن لا نيـب ظالـم ولا محتـال

مجرد واحدٍ جـا يكحـل عيونـه فيعميهـا 0..

ويوم إني خرجت وأقفيت لأرض الله وسيع الجال

علـى بـرٍ هـواه يـداوي العـلـة ويبريـهـا

أدور قصعة الجربوع والضـب الفتـي يختـال

والأرنب يا شفـاة الـروح محلاهـا وطاريهـا

بـلا كهـرب ولا بيجـر ولا غـازٍ ولا نقّـال

قوانيـن الحضـارة لا تبـي شوفـي ولا أبيهـا


" أتمنى تنال إستحسانكم "

::

:::

[ღأميـ الذوق ـرღ]

رايقة وكلاامها له مغاازي كثيرة ،،

سلمت يالنجم

تقبل مروري اخوي

[جميري بلا حدود]

مبدع
روووووووووووووووووووعه

الى الامام
الله يوفقك

[نجم ال جميره]

ترونتو منور يا الغالي والله يحفظك

جميري بلا حدود منور واشكر على الكلام الجميل

تم معرفة الشاعر وهو من قبيله عتيبيه

وكان يقصد بها حال بعض الشباب العاطل عن العمل

::

:::